2008/09/02 - Tinguian Compositor Mangilunsad Ti Albumna
Posted by SysAd on September 03 2008 04:10:49
by Julie Anne Chu/September 2, 2008

KALINAWA. Daytoy ti titulo ti umuna a solo album ni Mr. Elmer Tadeo a kayatna a sawen iti iloko ket gin-awa, iti ingles, comfort wenno wellness a mailunsad inton Oktubre 5, 2008 kas paset ti pannakarambak ti panagfiesta ti Sta. Teresita Parish, Peñarrubia.
Extended News
by Julie Anne Chu/September 2, 2008

KALINAWA. Daytoy ti titulo ti umuna a solo album ni Mr. Elmer Tadeo a kayatna a sawen iti iloko ket gin-awa, iti ingles, comfort wenno wellness a mailunsad inton Oktubre 5, 2008 kas paset ti pannakarambak ti panagfiesta ti Sta. Teresita Parish, Peñarrubia.

Mr. Elmer Tadeo.
Photo submitted by Julie Ann Chu


Segun kenni Mr. Tadeo, ti album ket saritaenna dagiti sumaganad: dagiti mapaspasamak iti Abra kangrunaan kadagiti nadumaduma a pakaseknan aglalo iti politika; ti in-inut a pannakapukaw ti napintas a kultura; ti pannakaibus dagiti kaykayo ken pannakaperdi dagiti kabambantayan ken karayan gapu iti pannakapukan dagiti kaykayo; love songs a mangisalaysay iti love story legends ti Tinguians; ken maipanggep iti naespirituan a panagbiag ken pammati.

Kinuna ni Tadeo a napilina ti nasao a parokia a pangiyam-ammoan ti umuna nga albumna gapu ta napigsa ti suporta dagiti lay leaders ken PPC ti Peñarubbia nga idauloan ni Mr. Philip Tingonong iti benneg ti cultural works.

Kaadduan kadagiti kanta iti album ket Tingguian songs. Segun kenkuana, tallo laeng ti Ilokano songs - maysa ti pinutar ni Mr. Nonie Galinato, maysa kadagiti nalaing a composer ditoy Abra.

“Panangi-promote ti bukod a kultura ken panangikkat iti saan a napintas nga imahen ti probinsia nga Abra (political killings),” daytoy ti mission ni Tadeo iti panagputarna iti kanta. Segun kenkuana, babaen kadagiti kanta a naputar, maipaganetgetna kadagiti agdengngeg nga adda latta namnama iti likudan dagiti parikut ken pannubok. “Siak, sika, agkaykaysatay amin, awisentay amin ti bileg ti amin a parsua tapno mapaadda ti kappia iti Abra,” kinunana.

Kinunana pay a babaen iti nasao nga album, namnamaenna nga agbalin nga instrumento daytoy iti pannakapaadda ti kappia ken namnama iti probinsia ti Abra ken ti pannakapabiag ti matmatay a kultura ti Tingguian ken Ilokano. Gapu ta mamati isuna a ti musika ket maysa a universal language, addaan daytoy iti napigsa nga impact kadagiti tattao a naayat iti daytoy. Babaen iti musika, mabalin a maidanon ti mensahe a kayat a maiwaragawag.

Segun kenkuana, addan dua nga album a na-produce idi 2001 ken 2003, “Good News in Tribal Rhyhtms, Salidummay Abra I and II,” proyetkto ti ECBA-CBCP. Segun kenkuana, tingguian ti melody dagiti kanta ngem Ilokano ti lyricsna.

Maysa isuna kadagiti nangurnos, nag-compose ken nangurnos kadagiti ubbing a nagkanta iti Good News in Tribal Rhyhtms, Salidummay Abra I. Ti part two ti nasao nga album ket compilation ti daan a recordings dagiti immuna nga SVD pakairamanan ti chanting, ken pannakatokar dagiti musical instruments, nga inurnosna agingga a nai-CD sadiay Manila.

Ti baro nga album a mailunsad ket naidumduma no maidilig kadagiti immuna nga album a naibaga gapu ta ti “Kalinawa” ti kaunaan a solo albumna.

Tubo ti Malibcong, Abra ni Tadeo manipud iti tribu a Gubang. Segun kenkuana, grade four isuna idi mangrugi nga ipakitana ti talentona iti benneg ti musika babaen iti panag-organisarna iti grupo nga agtokar ti bamboo ken guitar ensemble. Nagbalin a folk singer sadiay Baguio. Kinunana pay a kas gagangay nga estudiante nagbalin isuna a working student kas shoe shine boy, (agdalus ti sapatos) ken pony boy, mangrienda iti kabalio para kadagiti turista.

Nagtultuloy ti pannakaasa ti talento ni Tadeo iti benneg ti musika nupay adu dagiti rigat ken pannakauyaw a naglasatanna. Kinunana nga adda dagiti tiempo nga arigna sumukon gapu iti kinakurang ti suporta ken talek ti dadduma iti kabaelanna ngem naitultuloyna ti panag-compose ken panagkanta babaen kada Mr. Charles Javier nga imbilangna a kas pannakaama, da Fr. Oscar Alunday, SVD (mairaman iti album) ken Fr. Efren Ambre nga spiritual directorsna a nangpakired ken nangbayabay kenkuana.

Intuloyna ti panagessemna iti musika agingga a nagbalin isuna a kameng ti Cordillera Artist Group a nagputarda kadagiti ayug para iti International Arts Festival idi 2004. Ditoy a pinutarna ti kanta a “Paghilom, (An ode to Mother Earth)” inlawlawagna a saan laeng nga Ilokano ken Tingguian ti putputarenna a kanta, ag-compose pay met iti pagsasao a Tagalog ken Ingles.

Agpappabuya ni Tadeo iti Cultural Center of the Philippines iti konsierto a napauloan “Tanging Yaman Himig at Pananalig” ken soundscapes concert iti Folk Arts Theather a napauloan, “Manlilikha ng Bayan.”

Segun kenkuana, nakatulong iti pannakaiyam-ammona iti bukod a probinsia babaen kenni Mr. Philip Tingonong a nangimbitar kenkuana ken ti kaduana nga artist manipud iti Baguio City a nag-concert kabayatan ti naudi nga Arya Abra Festival.

Kinunana a makaputar latta isuna ti kanta uray no madama nga agtrabtrabaho iti Episcopal Commission on Biblical Apostolate (ECBA) iti CBCP. Bayat iti panagbibiahena, kinunana a saan nga agsarday nga agpanunot kadagiti balikas a mangbukel iti lyrics ti maysa a kanta ken panagputar iti melody babaen ti chanting uray no saan nga agsusurot agingga a mapagsusurotna ken maiyurnosna dagitoy kas maysa a kanta.

Kinunana nga importante pay a panunotenna nga umuna no ania ti tema gapu ta ditoy nga ibasarna ti turong ti komposisionna. Nadardaras kano a makaaramid isuna iti komposision no adda inspirasionna. Adda met dagiti kanito a marigatan nga ag-compose aglalo no saan a nasayaat ti mood wenno kondision ti panunotna.

Nupay kasta, kinunana a makaputar isuna ti kanta bayat iti tiempo ti depression ken confusion gapu iti panag-reflectna.

Segun kenkuana, saan nga asi-asi ti panag-produce ti musical album gapu ta dakkel a banag ti kaadda ti naan-anay a magasto para iti daytoy aglalo kadagitoy a panawen a nangina ti singir dagiti recording studio, talent fee dagiti back-up musicians ken dadduma pay a paggastoan iti panagproduce ti album.

Dakkel ti yamanna kadagiti benefactors a nakatulong kenkuana kangrunaan ni Fr. Martin Jaggi, SMD maysa a Bethlehemite nga agserserbi idiay Bontoc.
Kinuna ni Tadeo nga isagsagutna ti baro nga albumna para iti 50 a tawen a panaganibersario ti Sta. Teresita parish, Malibcong ken para iti SVD centennial celebration.