 by PCI Eduarde HC/Public Information Officer, Abra PNP/November 14, 2011
San Juan – dua a kaminero ti Abra Provincial Engineer’s Office ti napaltogan ken napapatay sadiay Sitio Palang, North Poblacion, San Juan, Abra idi November 8, 2011 agarup alas 10:15 ti bigat.
Nainaganan dagiti biktima a da Marlon Brioso y Edus, 37 – anyos, naasawaan ken naed iti Sitio Turod, Brgy. Culliong, San Juan, Abra; ken ni Renato Bersamin y Bosque, 39 – anyos, naasawaan ken naed iti Sitio Palang, North Poblacion, San Juan, Abra.
Naammuan nga adda iti trabaho dagiti biktima ken ti supervisor ken kakaduada a kaminero idi kellaat nga paltogan ida dagiti dua a saan pay laeng a nainaganan a lallaki.
Naglak-am iti adu a tama ti bala ni Brioso a rason iti dagus a pannakatayna idinto a nasugatan ken naitaray pay laeng iti pagagasan ni Bersamin. Nupay kasta, pimmusay met laeng daytoy kabayatan ti pannakatamingna iti ospital.
Nakaala dagiti kameng ti Scene of the Crime Operatives iti pito a basyo ti cal. 5.56, tallo a basyo ken bala ti 12 gauge shotgun iti nakapasamakan ti pammaltog.
Sakbay a pumusay iti operating room ti Abra Provincial Hospital (APH), naala dagiti imbestigador ti Dying Declaration ni Bersamin a no sadino ket innagananna ti maysa kadagiti suspects.
Saan pay laeng nga imbatad dagiti otoridad ti nagan ti suspect kabayatan ti pananganup dagiti pulis kadakuada.
|
Log in Zone
Statistics
User's registered...
Last year: 0
Birthday(s):
