by Rmacollo/January 3, 2007

BANGUED – Hacking

Gapu iti cellphone, tinagbat ti maysa a lalaki ti room mate na.

Iti report manipud iti Abra PNP Command, agarup alas 12:15 ti rabii idi December 15 idi agriri da Julio Lorenzana ti Zone 7, Bangued, ken ni Jerry Balderas, agnaed ti San Antonio, Bangued iti guard house ti Aquino Store idiay Zone 6, Sinapangan, Bangued. Helper ni Lorenzana iti nasao a pagtagilakuan.

Iti impormasion manipud iti Bangued Municipal Police Station, roommates dagiti dua ken rimsua iti saanda a kinnaawatan idi saan a masapulan ni Balderas ti cell phone na manipud iti locker.

Kabayatan ti argumentoda, napikar ti suspetsa a ni Balderas ket tinagtagbatna ni Lorenzana a nakasugatan ti kanawan nga abaga ken akinkanigid a paset ti tengngedna.

Dagus a naitaray iti Abra Provincial Hospital ti biktima tapno maagasan idinto a naglibas iti saan nga ammo a direksion ti suspetsa kalpasan ti pasamak ken subject ti manhunt dagiti otoridad.

Mapapati a buneng ti instrumento a nausar iti pannagtagbat nupay saan daytoy a na-recover dagiti imbestigador.


TAYUM – Stabbing

Nabagkong idi December 16 iti tengnga ti Don Mariano Marcos Bridge idiay Brgy. Bumagcat, Tayum ti maysa a tricycle driver.

Nabigbig ti driver a ni Jerrub del Rosario y Escobar ti Poblacion, Tayum a nabagkong iti barukongna babaen kadagiti tallo a saan a nainaganan a lallaki.

Iti pakauna nga imbestigasion, naglugan dagiti tallo a suspetsa iti tricyle ti biktima ket kinontratada daytoy iti P300 a pesos tapno maitulodda idiay Tagodtod, Lagangilang, Abra ken agsubli idiay Bangued.
Iti panagturongda ditoy Bangued, pinagsardeng dagiti suspetsa ti biktima iti tengnga ti Don Mariano Marcos Bridge. Ditoy a binagkong ti maysa kadagiti suspetsa ni del Rosario ngem limmaban daytoy.

Nagtataray dagiti suspetsa idi masilawanda iti naglabas a motorista iti rangtay.
Naala dagiti otoridad iti crime scene ti maysa a bread knife. Naitaray met iti pagagasan ni del Rosario tapno maagasan.


LAGANGILANG – Shooting

Maysa a mannalon ti napaltogan iti akinkainigid a sakana idi December 21, 2007 idiay Sitio Barbarit, Brgy. Tagodtod, Lagangilang Abra.

Iti report ti Lagangilang Police Station, alas 8:30 ti rabii iti nasao a petsa idi mapaltogan ni Aniceto Botanes babaen iti saan pay laeng a nabigbig a suspetsa.
Naammuan nga agiinum da Botanes ken tallo pay a kakaduana a nainaganan Roland Cruz, Junjun Ruben ken Pidol Rapitula iti nasao met laeng a lugar iti Mila’s Talipapa idi mapaltogan ti biktima.

Saan nga ammo ti motibo ken klase ti armas a nausar iti pammaltog.
Naitaray iti pagagasan ti biktima tapno mataming ti sugatna.


BANGUED – Illegal Possession of Firearms (RA 8294)

Inaresto dagiti tauan ti 1601st Police Provincial Mobile Group ti maysa a tao gapu iti panagikutna iti armas.

Iti report, tiniliw dagiti motorcycle cops nga indauluan ni PO2 Leo Annaban Dagson ni Danny Boy Gonzales, maysa a construction worker a naed idiay Poblacion, Lagangilang idi December 22, 11:45 ti rabii, idiay Boundary Videoke Bar, Brgy. Patucannay, Bangued, Abra gapu iti panagikutna iti maysa a homemade pistolized shotgun (one pong) ken dua a bala a gauge 12.

Naammuan nga agpatpatrulia dagiti motorcycle cops iti aglawlaw ti ili idi ipulong dagiti concerned citizens ti maysa a tao nga nagsabbikel iti paltog.
Dagus a nagturong dagiti otoridad iti establisimiento idiay Patucannay, Bangued ket ditoy a naalsipu ti armas manipud iti suspetsa.

Naipan iti Provincial Police Office ti suspetsa ken ti armas para iti umno a documentation.

Naisagana ti kaso a panagsalungasing iti Republic Act 8294 wenno illegal possession of firearms kontra kenni Gonzales.


BUCAY – Physical Injuries

Nagriri ti maysa a security guard ken maysa a tricycle driver a nagresulta iti pannakasugat, sumagmamano a minutos kasakbayan ti Paskua idiay Siblong, Bucay.

Iti report, naammuan nga idi December 24, 11:45 ti rabii idi dinangran ni Ronald Bernales y Belisario, trycicle driver, ni Norman Bersalona y Bobila, maysa a security guard.

Nailanad pay iti report manipud iti Bucay Police Station nga sakbay ti pasamak ket nagdinnanog da Bernales ken Bersalona a sinaruno ti panangsugat ti suspetsa iti biktima babaen iti patadem.

Naglak-am ni Bersalona iti sugat iti akinkanigid a takiagna kasta payen dagiti scratches iti akinkanawan nga abagana.

Naipan iti Bucay District Hospital ni Bersalona tapno maagasan idinto a naaresto ni Bernales ken madama ti imbestigasion iti daytoy.

Saan a na-recover ti patadem nga inusar ti suspetsa a mapapati a kitchen knife.


BANGUED – Explosion

Maysa a panagbettak ti napasamak iti pagtaengan ni Congresswoman Cecilia Luna idi rabii ti December 25.

Iti report ti pulisia, nagresulta ti panagbettak iti saan pay laeng a masinunuo a balor dagiti nadadael kasta metten ti pannakadangran ti pito a tattao karaman ti tallo nga annak ti kongresista.

Dagiti nadangran iti panagbettak ket dagiti sumaganad – Jendricks Luna, Ryan Luna, Cromwell Luna, PO3 Nathaniel Bermudez, Judy Gatol, Mario Blaza ken Randy Viloria.
Naipan dagiti nasugatan iti Seares Memorial Clinic para iti pannakatamingda.

Idi December 26, naipan ni Ryan Luna idiay Philippine General Hospital (PGH) idiay Manila gapu iti 3rd degree burns a linak-amna manipud iti panagbettak.
Bimmaba ditoy Abra dagiti personnel ti Explosives and Ordnance Team ti Police Regional Office Cordillera iti panangidaulo ni Police Senior Inspector Emilio Dallo ken ti Crime Laboratory field service personnel iti babaen ni Police Chief Inspector Coria-en a nangiproseso iti crime scene.


SAN JUAN – Shooting

Maysa a pammaltog ti napasamak idiay Brgy. Lumuba, San Juan, Abra idi December 26, 2007, alas 5:00 ti malem.

Iti report manipud iti pulisia, ti biktima ket nainaganan a ni Jason Castillo a mapapati a pinaltogan ni Jojo Tambag, residente ti Brgy. Taping, Dolores.
Iti pakauna nga imbestigasion ti San Juan Police Station, agawiden ti biktima idi makangngeg iti maysa a putok ti paltog.
Kalpasanna, immasideg ti suspetsa ken dua a kakaduana ket linugobanda ti biktima nga awan aniaman a rason.

Nagtaray ti biktima ngem pinutokan ti suspetsa iti namindua a daras a rason iti pannakasugat ti likudna.

Intaray dagiti kakabagianna ni Castillo sadiay Dolores District Hospital ken naiyalis idi agangay idiay Abra Provincial Hospital para iti pannakaagasna.

Naglibas dagiti suspetsa iti saan nga ammo a direksion kalpasan ti pammaltog.
Kanaig iti daytoy, naglak-am met ni Garry Beroña, nabigbig a maysa kadagiti kadua ni Tambag ken residente met laeng ti Taping, Dolores, iti sugat gapu iti paltog iti kanigid a pungupunguanna ket naipan iti APH tapno maagasan.

Saan pay laeng nga ammo ti klase ti paltog a naaramat iti krimen idinto a kitkitaen dagiti otoridad ti old grudge wenno sigud a riri a motibo iti pasamak gapuenta ni Jojo Tambag ket nagbalin a biktima ti pammagkong babaen iti maysa a mapapati a kabagian ti biktima a ni Jason Castillo.


LANGANGILANG – Stabbing

Maysa a pammagkong ti napasamak idiay Poblacion, Lagangilang, Abra idi January 1, 2008.

Basar iti records ti Abra PNP, ti biktima ket nabigbig a ni Jonathan Guettap y Olivar, 33-anyos, awanan asawa ken residente ti Poblacion, Lagangilang.

Segun iti report, ni Guettap ti binagkong ni Luciano Tamo Jr. y Pugrad alias Jong-jong. Naammuan nga agtatrabaho ti suspetsa iti kompania nga Eco Corp. idiay Taguig City. Agnaed met laeng iti nasao a lugar ni Tamo.

Iti pay laeng report, magmagna ni Guettap kaduana ti maysa a managan Ranny Boy Anog y Alconis manipud iti plaza ti ili idi kellaat a rimmuar manipud iti likudanda ni Tamo a nangbagkong iti biktima iti akinngato a kanawan a paset ti barukongna.
Dagus nga intaray dagiti pulis manipud iti Lagangilang Municipal Police Station ni Guettap iti Abra Provincial Hospital ditoy Bangued ngem naideklarar a dead on arrival (DOA) babaen kadagiti medical personnel sadiay.

Inaresto dagiti pulisia ti suspetsa ken addan iti custody ti Lagangilang MPS agingga iti preliminary investigations iti kaso.

Saan a na-recover ti nausar iti pammagkong idinto a mapapati a sigud a susik wenno saan a kinnaawatan ti motibo iti krimen.

Iti follow up report, naipilan ti criminal complaint a murder kontra kenni Tamo gapu iti pammagkong kenni Guettap.


BANGUED – Gambling

Nangisayangkat iti raid dagiti kameng ti Abra PNP Command iti maysa a masuspetsa a gambling den idiay Zone 1, Linasin, Bangued.

Iti report ti pulisia, nasiputan dagiti makisugsugal ti isasangpet dagiti pulis ket nagtatarayda iti nadumaduma a direksion.
Nabati dagiti mapapati nga agsusugal dagiti gambling paraphernalia pakairamanan ti pito a dice para iti sugal a dado, 91 chips a pagtaya, tallo a jar cover, maysa a black ballpen ken P2, 320.00 a kuarta.

Dagiti nakumpiskar nga paraphernalia ti naala iti Abra PNP Command for proper disposition.


BANGUED – Gambling (PD 1602)

Nangisayangkat dagiti kameng ti Provincial Intelligence and Investigation Division nga indauluan ni Police Chief Inspector Melvin Napiloy iti anti-illegal gambling operation idiay Petron Gasoline Station idiay Zone 1 ken iti parking area ti traysikel nga agpa-Penarrubia tricycle idiay Zone 5, Bangued, idi alas 9:35 ti rabii ti December 30, 2007.

Nagresulta ti operasion iti pannakaaresto dagiti sumaganad – Bernard Pacioles, Eugene Pacioles, Abner Almazan, Carmelo Almazar ken Carlos Barcena, agpapada a residente ti Brgy. Calaba, Bangued; karaman pay a natiliw da Cecilio Ordoña, Zone 1 ken Rexon Gatoc Aquino ti Zone 6, Bangued.

Naala manipud kadagiti suspetsa ti gatad a P773.00, dice ken dadduma pay a gambling paraphernalia. Naipan dagiti naaresto ken dagiti nasamsam a ramit iti Abra PPO para iti umno a documentation.


SAN JUAN – Stray Bullet

Maysa a sigud a kameng ti Sangguniang Bayan idiay San Juan ti nadangran iti mapapati a naiyaw-awan a bala iti umuna nga aldaw ti 2008 idiay Brgy. Badas, San Juan, Abra.

Nainaganan ti biktima a ni Evangeline Manzano, 43-anyos, ken residente iti nasoa a lugar.

Naammuan nga naala ni Manzano iti stray bullet kabayatan ti panagsasangoda iti pamilyana iti media noche iti sanguanan ti balayda idi kellaat a matamaan ti ulona.

Naitaray ni Manzano iti pagagasan para iti pannakataming ti sugatna.


DOLORES – Shooting

Napaltogan ni Armando Balneg babaen kenni Jomar Eduarte idi ala 1:40 ti parbangon ti January 1 sadiay Sitio Ansad, Brgy. Salucag, Dolores.

Iti imbestigasion ti Dolores Police Station, agiinum ti biktima ken suspetsa ken kakaduada iti pagtaengan ti maysa a managan Diosdado Trinidad.
Kalpasan ti sumagmamano a bote a nainumda, nagawid ti biktima idi rummuar koman iti balayda, pinaltogan isuna ti suspetsa a nakatamaan ti buksitna. Naitaray ti biktima iti pagagasan.

Segun iti pulisia, drunkenness wenno kinabartek ti motibo iti pammaltog. Saan pay laeng nga ammo ti klase ti paltog a naaramat iti krimen.


MANABO – Sighting of CTs

Sumagmamano nga armado a lallaki ti naipadamag a nakita idiay Sitio Kasagudan, San Ramon East, Manabo idi rabii ti January 1, 2008.

Segun iti source, saan nga ammo dagiti nakakita no siasino ti lider ti nasao a grupo wenno ania iti mission da iti nasao a rabii.
Segun pay iti report, nagturong ti armado a grupo iti abagatan iti tri-boundary ti Luba, Boliney ken Manabo.

Gapu iti daytoy naalerto dagiti otoridad ket impangatoda ti security measures iti lugarda.


DOLORES – Shooting

Napalpaltogan ken napapatay ti maysa a baket nga agtawen iti 60 idiay Brgy. Kimmalaba, Dolores idi January 2, 2008.

Iti report manipud iti Dolores PNP babaen kenni OIC Inspector Amadeo Garcia, napasamak ti krimen agarup alas 7:30 ti rabii iti nasao a lugar.
Nabigbig ti biktima a ni Mrs. Salvacion Talledo a naglak-am iti tama ti bala iti nadumaduma a paset ti bagina.

Segun iti Dolores Police Station, mapapati nga M-14 ti nausar iti pammaltog basar iti lima a basyo ti bala a naala dagiti imbestigador iti crime scene.

Iti report ti pulis, nakiddaw ti autopsy iti bangkay ni Mrs. Talledo.
Naammuan a kinadua ni Talledo ti apokona nga napan iti CR nga adda iti ruar ti balayda idi mapasamak ti pammaltog.

Segun kenni Mayor Albert Guzman, nagkandidato a para kagawad ti barangay ni Nana Cion idi napalabas a barangay elections ngem naabak idinto a ti asawa ti biktima a ni Ireneo Talledo ket kimmandidato met iti kina-Sangguniang Bayan idi May 2007 iti lineup na ngem naabak met laeng.

Rating is available to Members only.

Please login or register to vote.

No Ratings have been Posted.