by Rmacollo/February 3, 2010
Abra – sumagmamano a soldados ti natay iti napasamak a pannakilabanda kadagiti rebelde nga NPA idiay Tubo ken Malibcong idi January 31, 2010 oras ti alas siete ti bigat ken alas kuatro iti malem.
Iti impormasion nga imparuar ti 503rd Brigade ti Philippine Army idiay Lagangilang, Abra, nakaawatda iti report manipud kenni Lt. Col. Rogelio J. Migote, commanding officer ti 50IB, a dua a soldados a da Pfc. Jason D. Pantaleon ken Pfc. Jayson Grutas ti nasugatan ngem dagus a naipan iti Abra Provincial Hospital para iti pannakaagasda. Nasugatan dagiti dua nga soldados iti engkuentroda kadagiti mapapati a rebelde nga NPA iti ruar ti Brgy. Kili, Tubo idi bigat ti January 31. Naammuan a nagpatrulia dagiti tropas kalpasan nga ipadamag dagiti umili sadiay ti kaadda dagiti NPA iti lugar.
Iti sabali a bangir, nakalaban met dagiti tropas ti 41st Infantry Battalion dagiti mapapati a rebelde idiay Malibcong.
Basar iti report manipud kenni Lt. Col. Ignacio Madriaga, commanding officer ti 41st IB, agarup alas kuatro ti malem ti January 31 idi paputokan dagiti NPA ti maysa a platoon dagiti soldados iti kabakiran a paset ti Brgy. Mataragan, Malibcong kabayatan ti panagpatruliada iti lugar.
Lima a soldados ti natay iti nasao nga laban idinto a saan met a masinunuo ti bilang dagiti napasag iti biang ti kalabanda a grupo.
Nainaganan dagiti natay kabayatan ti laban a da Pfc. Robert B. Lobhoy, Pfc. Saldivar W. Anno, Pfc. Honey N. Mateo, Pfc. Angelo P. Calderon, ken Pfc. Santiago S. Decena.
Dagiti nasugatan ket pakairamanan da Pfc. Ronel Villanueva, Pfc. Manny L. Marcos, Pfc. Neceson B. Gemino, Pfc. Alfredo Ganongan, Pfc. Abraham Bobis, Pfc. Billy Ray A. Noblado, Pfc. Conrado H. Torres, Pvt. Brainard T. Domondon.
Naipan amin dagiti nasugatan iti APH babaen iti helicopter agarup alas onse ti bigat ti Pebrero 1 tapno maagasan kasta met dagiti natay para iti pannakatamingda.
Naammuan pay manipud iti 503rd Brigade a dagiti soldados ti mangituloy koma iti Community Relations activities da kadagiti nadumaduma a barangay ti Malibcong idi mapasamak ti engkuentro.
Segun kenni Col. Essel Soriano, commanding officer ti 503rd Brigade, ti pasamak ket mangipakita laeng iti panagkedked dagiti rebelde iti panagdur-as nga ididiaya ti gobierno babaen kadagiti soldados nga adda kadagiti nasulinek a luglugar kasta metten ti saanda a panangikankano iti inisitiabo ti kappia nga ididiaya dagiti nadumaduma a security forces ken ti gobierno local ti probinsia nga Abra.
