by Marjorie B. Trinidad/June 4, 2009
Pinadayawan ken nakaragsakan dagiti kakabagian ken gagayyem ni Justice Lucas P. Bersamin ti pannakadutok daytoy kas maysa kadagiti 15 nga Associate Justices iti Supreme Court wenno kangatoan a pangukoman iti Pilipinas.
 |
| Justice Lucas P. Bersamin |
Maipalagip nga idi Abril 1, 2009, pinusgan ni Presidente Gloria Macapagal-Arroyo ni Bersamin kas maika-163rd a justice iti Korte Suprema.
Idi Mayo 23, 2009, narambakan ti Nasantoan a Misa nga indauloan ni Msgr. Leopoldo C. Jaucian, SVD, Obispo ti Diosesis ti Bangued kas pagyaman ni Justice Bersamin ken pamiliana gapu iti sagut ken dayaw a naawatna nga agbalin a maysa kadagiti mahistrado ti Kangatuan a Pangukoman.
Segun kenni Bishop Jaucian, daytoy a nagun-od ni Justice Bersamin ket maibilang kas namnama ti probinsia nga Abra gapu ta maysa daytoy a natakneng ken nakappia a tao.
“He is a hope for Abra,” kinuna ni Bishop Jaucian.
Segun pay iti Obispo, iti agdama ket makitkita ken marikrikna tay ditoy Abra ti kinadamsak ken kinaawan respeto iti biag nga impabulod ti Namarsua. Kinunana nga adda dagiti Abrenioa makaitured a manggudas ti biag ti padana a pinarsua a saan koma a rumbeng nga aramiden ti maysa a tao.
Mangnamnama ti Obispo nga agbalin koma nga ehemplo ni Justice Bersamin kadagiti padana nga Abrenio nga agbiag kas nalinteg ken nakappia a tao.
Indawat ngarud ti Obispo kadagiti amin a kaprobinsiaan nga agkaykaysa koma a manglapped iti kinadamsak. Imbagana a sapay koma ta agbiag koman a nalinteg ken nakappia dagiti Abrenio tapno agdur-as ti Abra.
“Together, let us say, no to violence,” kinuna ni Bishop Jaucian.
Abra’s pride
Segun kenni Mayor Dominic Valera, dadaulo ti kabisera ti Abra, ti pannakagun-od ni Justice Bersamin iti posisionna sadiay Supreme Court ket maibilang kas achievement ti probinsia. Ni Valera ket maysa kadagiti batch mates ni Justice Bersamin iti high school.
Segun iti mayor, maipagpannakkel la unay nga adda maysa nga Abrenio nga agserserbi kas mahistrado sadiay kangatoan a pangukoman. Gapu iti dayta, maysa a resolution kas pammigbig ken pammadayaw ti inted ti Local Government Unit (LGU) ti Bangued kenni Justice Bersamin.
Kinuna met ni Congresswoman Cecilia S. Luna a naragsakan unay daytoy idi naammuanna a nadutokan ni Justice Bersamin kas maysa kadagiti Associate Justices iti Supreme Court.
Segun kenkuana, manmano ti maikkan ti oportunidad nga agserbi iti kangatoan a pangukoman iti intero a pagilian. Kanayonan iti dayta, kinunana a manmano iti gundaway a datayo nga Abrenio ket adda personal nga am-ammotayo sadiay Supreme Court. Impalagip ni Luna a ni Justice Bersamin ti namagsapata kenkuana idi isuna ti naipatugaw kas mangibagi iti Abra sadiay Kongreso.
“You made us all happy and proud,” kinuna ti kongresista.
Iti met panagsarita ni Atty. Joselito Benedito, presidente ti Integrated Bar of the Philippines (IBP) - Abra Chapter, ti ascension ni Justice Bersamin sadiay Korte Suprema ket maysa nga inspirasion para kenkuana kas abogado tapno agarapaap iti nangatngato pay a posision. Segun pay kenni Benedito, mamati isuna a ti itatayok ni Justice Lucas ket mangted ti kaipapanan ti sarita a namnama-- a gapu iti dayta a namnama, maragpat ti kasayaatan para iti probinsia nga Abra.
Kamaudiananna, gapu iti naisangsangayan a naragpat ni Justice Bersamin, nangted met ti plake dagiti kameng ti IBP kas pammigbig iti padada nga abogado.
Dagiti nagbalin a paset iti biag ni Justice Lucas
Dimmar-ay pay met iti nasao a parambak dagiti nagbalin a paset iti biag ni Justice Lucas. Segun kenni Mrs. Quemerista Beleno, sigud a tutor ni Justice Lucas ken dagiti kakabsatna, dakkel ti panagyamanna gapu ta imbilangda isuna kas paset ti biagda.
Kinuna ni Mrs. Beleno a saan koma payen a rumbeng a suroanna ni Lucas gapu ta arigna nasirsirib pay ngem isuna ngem inaramidna latta daytoy gapu iti trabahona.
Innayonna pay a saan met a ni Lucas ti kanayonna a suroan ngem ketdi, dagiti inaudi a kakabsatna a da Bambino ken Nando (kabsat ni Justice Lucas). Segun kenni Mrs. Beleno, aglaplapusanan ti ragsakna gapu ta dagidi bannogna ket nagbalin a paset iti pannakagun-od ni Justice Lucas iti tarigagayna.
Iti sabali a bangir, nagbalin pay met a tutor dagiti agkakabsat a Bersamin ni Mr. Charles Javier. Kinunana a ni Justice Lucas ken dagiti kakabsat ti nangted inspirasion tapno agbalin isuna a nalaing a mangisursuro. Kas iti nakuna ni Mrs. Quemerista, saanen a rumbeng pay a suroan idi ni ubing a Lucas gapu ta nasirib ken nagaget daytoy nga agadal.
Kamaudiananna, nagyaman ni Mr. Javier a nagbalin isuna a paset ti biag ni Justice Bersamin. Indawatna pay a saan laeng koma nga agpatingga isuna kas Associate Justice ngem ketdi magun-odna ti kangatoan a posision iti Korte Suprema.
“I salute you my brother”
Iti sabali a bangir, kinuna ti ama ti probinsia a dakkel a pakaidayawanna a ti kabsatna ket maysa kadagiti 15 nga Associate Justices sadiay Korte Suprema.
Kinunana a nasingpet nga ubing ni Lucas gapu ta no sumangpet idi nga aggapu iti pagadalan ket agdiretso iti siledna nga agbasa wenno agaramid ti altarna. Ngem isuna ken ti kabsatna a daydi Bambino ket agtarusda kadagiti kamanokanda. Linagip ti gobernador nga idi kaubingda ket saanda unay nga agrirriri kenni Lucas, sa laeng agriri dagitoy no agi-innagawda iti kanen gapu ngarud ti kinaadu dagitoy nga agkakabsat.
Nupay kasta, itan ta naragpaten ni Justice Lucas dagiti arapaapna, sinaludoan daytoy ti gobernador gapu ta nangaton ti naragpatna a posision. Impangasna nga imbaga a ti Korte nga ayan ti kabsatna ket isuna ti makuna a court of the champions. Kinunana a dagiti laeng nasisirib ti makadanon iti kangatoan a pangukoman.
Impagpannakkelna pay nga imbaga a maika-siam idi ti kabsatna kadagiti nangala iti Bar Examination. Ken isuna laeng ti nakaala ti 100% iti criminal law.
Kamaudiananna, kinunana nga ipagpannakkel isuna dagiti amin nga Abrenio babaen iti namnama nga indanonna ditoy Abra.
4th Abrenio at the Supreme Court
Indanon met ni Justice Bersamin ti panagyamanna kadagiti amin nga Abrenio aglalo iti pamiliana nga awan sarday a nangsuporta kenkuana. Kinunana a dakkel a tulong kenkuana ti panagbasana sadiay St. Joseph Seminary idi adda pay laeng iti sekundaria gapu ta daytoy ti nagmuli kenkuana kas maysa a nasayaat a tao.
Nagyamananna pay dagiti kaeskuelaanna iti high school aglalo iti Batch 1965 gapu ta nagtultuloyda a nangsuporta kenkuana. Kinunana a saanna a pulos a nalipatan isuda agingga a nagbalin isuna a mahestrado iti Korte Suprema.
Kas pammigbig iti nagbasaanna idi high school, inkari ni Justice Bersamin a tulonganna dagiti ubbing a kayatna ti sumrek iti seminario a saan a makabael a mangbayad iti matrikulana.
Kinunana a nagasat isuna gapu ta isu ti maikapat nga Abrenio a nagbalin a kameng ti Korte Suprema. Segun kenkuana, da Justice Ignacio Villamor, Justice Jose Maria Paredes ken Julio Villamor dagiti Abrenio a nangserbi kas mahistrado iti Supreme Court. Ngem kinuna ni Bersamin a nagasat latta isuna gapu ta kabagianna amin dagiti nagbalin a justices. Kinunana a ti nagun-odna ket sagut ken idatonna kadagiti kaprobinsiaanna a taga-Abra.
Kinunana pay nga un-unaennanto a tulongan dagiti taga-Abra no dagitoy ti agkasapulan. Inyangawna pay nga imbaga ga isuna ti makaammo kadagiti abogado wenno piskal nga adda ar-aramidenna a saan a nasayaat.
Ni Justice Bersamin, 59 ket dinutokan ni Pres. GMA sadiay Court of Appeals idi Marso 10, 2003.
Kasakbayan a nagbalin nga Associate Justice, napadayawan isuna kas Regional Trial Judge ken nagbalin pay a Presiding Judge ti Quezon City Regional Trial Court, Branch 96 idi Nobiembre 1986.
Naawat pay ni Bersamin ti Chief Justice Jose Abad Santos Award para iti Outstanding RTC Judge idi 2002. Kasakbayan pay dayta, naalana ti pammadayaw kas Best Decision in Civil Law and Best Decision in Criminal Law Awards.
Nagadal ti kinaabogasia sadiay University of the East idi 1973 ken maika siam a kangatoan iti Bar Examination iti dayta met la a tawen babaen iti grado nga 86%.
Naiyanak idi Oktubre 18, 1949 ditoy Bagued, Abra ken nakiasawa kenni Aurora Bagares- Bersamin. Naparaburanda iti uppat nga annak- da Atty. Pia Cristina Bersamin- Embuscado, Luis Isidro Bersamin, Lucas Riel Bersamin Jr., ken Karrisa Dominique.
